hokkaido milk bread taste@BMS

初學做麵包，今次黎件「牛奶吐司」，而家先發覺平凡嘅吐司比普通麵包做起上黎難，因為個麵團搓得好唔好，係好影響到個吐司嘅外形，而摺法又係要留意，會影響到個拉絲效果，但最重要，份量要準確之餘，要好留意焗爐上下火嘅熱度，如果唔睇火，個山形頭會變成火山頂，出爐個下就真係火山爆發🌋🌋🌋，個吐司硬到應該掟得死一隻🐕。

之所謂「平凡中見不平凡」，今日小妹深深感受到，做得到真係唔容易，好似打工咁，係公司最好無乜人知你叫乜名，但又要比上司知妳有返工，又做到下野，又唔係公司最早同最遲放工個位，都真係幾難做到架！😅😅😅

coffee taste@% Arabica Hong Kong IFC

喜歡飲咖啡，尤其是黑咖啡，因為無咗牛奶既加入，我可以完全嚐到咖啡的原有氣味、酸度和淺濃度。經朋友介紹下先知係IFC有呢間Coffee shop，之前經過中環，就專登去試下，呢間coffee shop裝潢走日式簡約路線，有一個透明玻璃房，見到入面存放了一袋袋既咖啡豆，店員不時會係入面磅下咖啡豆出黎，好有家庭式作業既感覺， coffee shop以外賣咖啡為主，點了一杯short size既Americano，問店員係乜野豆黎? 佢好有禮貌地話我知，原來係使用佢現行賣緊咖啡豆既menu其一款，今個星期用呢款豆下個星期就用下一行個款豆，等客人可以先試下佢哋沖既，好既再買都未遲，跟住，我呢啲煩人，又要求個店員話：想飲Americano又唔想咁淡，可否加少啲水? 佢好好咁問coffee bar tender 同事，可以只加半杯水嗎? 佢哋話無問題。令我覺得佢哋既服務好之餘亦好體貼！講返杯咖啡，佢哋個個星期用咗Ethiopia Ninety plus level-up Danch Meng，沖出黎氣味真係有少少chocolate同果味，但味道唔算好濃，酸度剛好。價錢$40，坦白講我覺得唔貴，有咁既水準既咖啡，值得再幫襯啦!

afternoon tea taste@Kerry Hotel

有朋友係朱古力粉絲，佢愛朱古力情度只係低於佢口中的兩大三細(阿爸阿媽同3隻小花猫)，每逢有朱古力主題的Afternoon tea佢都試，我亦都好慶幸，佢好多時候都會搵埋我去試，雖然我唔係食得好甜得既人，但朱古力我好少say no。今次試既係黃埔碼頭新開酒店Kerry Hotel推出既朱古力下午茶，呢個朱tea話係由名廚打造，我同朋友都抱住高度盼望的心能去試，週未無得book，只可以walk in，昨日仲要黃雨，我哋都照去，估唔到 ♪♪天氣不似預期~ 個朱tea都係一樣😞😞，成個tea set只係得個3件甜品有朱古力味既，而其他甜品同朱古力完全無關係，而味道只是一般，其中的「煙燻燉羊梨」裡面有羊奶芝士，味道好濃好酥，坦白講我接受唔到，因為真係酥都友無朋，我朋友直情唔食！不過，我相信都有人鍾意既。今次呢個朱古力下午茶，個人總體意見係：外在美好過內在美啦😂😂😂

cooking taste@BMS

上年9月學人整麵包，之後，久唔久都會自己上下網，睇下人哋啲食譜整下俾自已食又整下比人食，通常整比人食都係揀啲難度系數低既食品(例如:曲奇、muffin等)，以避免令人難入口！其實學整包後，自己整下整下都由只係整包，慢慢發展到家常小菜，開始發覺煮野食係會令人提升「耐性」度，因為急唔黎，尤其是做麵包，時間同份量真係唔可以free style。所以，寫呢個Blog好希望將生活上體驗到既早餐、常餐、下午茶、晚餐、咖啡或茶，都想同人分享。